नेकपा एमालेका सुदूरपश्चिम प्रदेश समिति अध्यक्ष कृष्णप्रसाद जैसीले अहिलेको समयमा केपी शर्मा ओलीको विकल्प नरहेको बताएका छन् । नेकपा एमाले जिल्ला कमिटी दार्चुलाले आयोजना गरेको अगुवा कार्यकर्ता भेला तथा प्रशिक्षण भेलालाई सम्बोधन गर्दै उनले यस्तो बताएका हुन् ।
‘वर्षभरि एमाले भइरहने तर निर्वाचनको समयमा एमाले नहुने प्रवृत्ति छोड्नुपर्छ,’ अध्यक्ष जैसीले भने, ‘एमालेमा रहनेले वर्षभरि नै एमाले रहनुपर्छ ।’ प्रशिक्षण भेलालाई सम्बोधनको क्रममा एमालेको संगठनमा काम नगर्ने तर एमाले भैरहने भए अहिले छोडेर जाँदा हुन्छ ।
आफुले टिकट पाउँदा ठिक हुने तर अरुले पाउँदा प्रचार पनि गरेजस्तो गर्ने प्रवृत्ति ठिक होइन्, उनले भने, जसले पाए पनि एमालेले पाउँछ । एमालेको अभियानमा सधैं लाग्नुपर्छ ।
पार्टीविरुद्धमा घेराबन्दी भइरहेको बेला सबै कमिटी सक्रिय हुनुपर्छ । उनले भने, अहिलेको समयमा सम्मानीय पूर्व राष्ट्रपति विद्यादेवी भण्डारीले सम्मानित ढंगले नै बस्नुपर्छ ।
पार्टीको भदौ २०–२२ गते हुने विधान महाधिवेशनको सन्दर्भमा पार्टी कार्यकर्तालाई खुलारुपमा सुझाव दिन उनले आग्रह गरे । नेकपा एमालेले अहिले प्रदेश भरिका ९ ओटै जिल्लाबाट विधान संसोधनबारे सुझाव लिने काम गरिरहेको छ ।
