दार्चुला — व्याँस गाउँपालिका–२ दुम्लिङका जानकी बुढाथोकीको नवजात शिशुको लागि आर्थिक सहयाेग जुटेकाे छ ।
जिल्ला अस्पताल दार्चुलामा नवजात छाेरी जन्मदिएकी जानकीकाे लागि बुटवल घर भइ भृकुटी विकास बैंकका पूर्व प्रमुख कार्यकारी अधिकृत लोकनाथ भुसालले ११ हजार रूपैयाँ सहयोग गरेका हुन्।
गत असार ३१ गते जानकीका श्रीमान् नारायण बुढाथोकी सदरमुकाम खलंगा आउने क्रममा तुइनबाट खसेर महाकाली नदिमा वेपत्ता भएका थिए ।
श्रीमती सुत्केरी हुने भनेपछि चाहिने समानकाे जाेहाे गर्न जाने क्रममा तुइन चुडिएर नारायण वेपत्ता भएका थिए ।
यसअघि जानकी सँग १० वर्षका छाेरा समीर छन् ।
कुस्मा बुढाथोकीकाे काेखबाट जन्मिएका नारायण परिवारका सबैभन्दा जेठाे सन्तान हुन् । तीन छाेराकाे आमा बनेका कुस्माका दुई छोराको पहिल्यै मृत्यु भयो ।
पहिलो दिनेशलाई पाँच वर्षको उमेरमा निमोनियाले लियो । छोरा वितेको केहि समय पछि श्रीमान नेत्रको मृत्यु भयो ।
अर्को छोरा सुरेश ९ वर्षको हुँदा वित्यो । फोक्सोमा क्यान्सर पीडित छोराको उपचारको लागि कुनै कसुर बाँकी राखेन् कुस्माले । घरको जायज्येथा उपचारमै लगाए । तर छोरो कहिल्यै नफर्किने गरी गयो ।
जेठो सन्तान नारायणको सहारामा थिइन्, कुस्मा । नारायणले संसार छोडेपछि कुस्मा र जानकीकाे।सहारा १० वर्षका नाति र नवजात शिशु छन् ।
आर्थिक अवस्था कमजोर रहेका जानकीकाे परिवारलाई प्रमुख जिल्ला अधिकारी अनिल पाैडेल नेतृत्वमा आर्थिक सहयाेग संकलन गरिएको थियाे ।
कर्मचारी र सुरक्षाकर्मीले संकलन गरेकाे ४५ हजार ५६० रूपैयाँ सहयाेग बुधबार जिल्ला अस्पतालमा पसगेर हस्तान्तरण गरेका थिए ।
