व्याँसको टिंकरमा अत्यधिक वर्षापछि आएको बाढिका कारण पुल र बाटो अवरुद्ध भएपछि पूरै गाउँ सम्पर्क विच्छेद भएको छ । छाङ्गरुदेखि टिंकरसम्म पर्ने तीन वटा काठेपुल टिंकर खोलाको बाढिले बगाएपछि गाउँ पूरै सम्पर्क विच्छेद भएको हो ।
टिंकर खोला पुल, नाम्पा पुल र चम्लीङ खोलाको पुल बाढिले बगाएको व्याँस गाउँपालिका–१ का बीरेन्द्रसिह तिंकरीले जानकारी दिए । राती आधाघण्टा जति मात्रै वर्षा भएको हो । ७ः३० देखि ८ बजे रातिको समयमा स्थानीयले बादल फाटेको आंशका गरेका छन् । बादल फाटेकै कारण खोलाहरुमा एक्कासी पानी बढेको उनले बताए । अहिलेसम्म यी खोलाहरुमा यसरी बाढि आएको जानकारी छैन् ।
टिंकरमा रहेका नेपाल टेलिकमको टावरले पनि काम गरेको छैन् । गाउँको अवस्थाबारे जानकारी दिन समेत नसकिएको टिंकरीले बताए । टिंकर खोलामा बाढि बढेपछि स्थानीय त्रसिद बनेका छन् ।
गाउँको अवस्था अहिलेसम्म सामान्य नै रहेको जिल्ला प्रहरी कार्यालय दार्चुलाका डिएसपी प्रकाश दाहालले बताए । उनले भने, ‘टिंकर सीमा प्रहरी चौकीसँग सेटमार्फत सम्पर्क भएको छ गाउँ सुरक्षित छ । अहिले टिंकरबाट प्रहरी परिचालन गरिएको छ ।’
पुल बगाएको जानकारी आएको छ । छाङ्गरु र टिंकरबाट बाढिले गरेको क्षतिको अवस्थाबारे जानकारी लिन प्रहरी पठाइएको छ ।
सशस्त्र प्रहरी बल नेपाल नम्बर ४४ गणका गणपति देवराज जोशीका अनुसार वर्षा र चट्याङ सँगै आएको थियो । चट्याङका कारण सशस्त्र प्रहरीको भी स्टाटले समेत काम गरेको छैन् । छाङ्गरुदेखि टिंकरसम्मको झण्डै ३।४ सय मिटर बाटो बाढिले बगाएको छ ।
