दार्चुला । दार्चुला जिल्ला अस्पतालको बेड नम्बर ९ । त्यहाँ सुत्केरी बुहारीको सिरानीमा हात राखेर बसिरहेकी थिइन, व्याँस गाउँपालिका–२ दुम्लीङकी ४५ वर्षीया कुस्मा बुढाथोकी । बुहारी जानकी बुढाथोकीले साउन २७ गते दोस्रो सन्तानको रुपमा एक छोरी जन्माएकी छिन् ।
छोरी पाएको खुसीमा परिवार रमाउनुपर्ने थियो । तर छोरी पाएको खुसी बाँड्न यो परिवार सकिरहेको छैन् । काखमा बच्चा हालेर मुस्कान बाँड्न पाउनुपथ्र्यो, तर त्यो खुसी अधुरो भएको छ । कुस्माका छोरा जानकीका श्रीमान् नारायण बुढाथोकी यो संसारमै छैनन् ।
श्रीमतिको पेटमा दोस्रो सन्तान हुँर्कदै गर्दा नारायणको अनुहारमा मुस्कान ल्याएको थियो । गर्भवती श्रीमतीलाई आवश्यक सामान किन्ने भनेर असार ३१ गते सदरमुकाम खलंगा जाँदै थिए । तर, महाकाली नदीमाथि तुइन पार गर्ने क्रममा तुइनबाट खसेर उनी बर्खाको महाकाली भेलमा वेपत्ता भए । त्यो दिनदेखि जानकीको संसार सुनसान भयो, र कुस्माको हृदय फेरि टुक्रिएको छ ।
तीन छोराकी आमा बनेकी कुस्मा सँग छ त केवल एक छोरी भावना । बुहारी जानकी र नाती वर्ष १० का समिर । दुई छोराको पहिल्यै मृत्यु भयो । पहिलो दिनेशलाई पाँच वर्षको उमेरमा निमोनियाले लियो । गाउँमा उपचार गराउन कुनै स्वास्थ्य संस्था त्यो बेला थिएन् । उपचारकै लागि दार्चुला हुँुदै भारतको पिथौरागढसम्म पु¥याए । तर उनलाइ बचाउन सकेनन् । छोरा वितेको केहि समय पछि श्रीमान नेत्रको मृत्यु भयो । अहिले श्रीमान् वितेको १८ वर्ष बढि भयो ।
अर्को छोरा सुरेश ९ वर्षको हुँदा वित्यो । फोक्सोमा क्यान्सर पीडित छोराको उपचारको लागि कुनै कसुर बाँकी राखेन् कुस्माले । घरको जायज्येथा उपचारमै लगाए । तर छोरो कहिल्यै नफर्किने गरी गयो । जेठो सन्तान नारायणको सहारामा थिइन्, कुस्मा । नारायणले संसार छोडेपछि सहारामा रहेका बुहारी छोरी, नातीको अनुहार हेर्दै बसेकी छिन् ।
आर्थिक अवस्था कमजोर भएकै कारण छोरी भावनाको पढाई अधुरै रह्यो । ९ कक्षासम्म मात्रै पढेका भावना अहिले गाउँमै छिन् । घरमा कमाउने पुरुष कोही छैनन् । बुहारीले भर्खर सन्तान पाएपछि बुहारी नातनीको रेखदेख गर्न उनी अस्पतालको बेडमा बुहारी सँगै बसेकी छिन् । दुम्लीङमा झोलुङ्गे पुल नहुँदाको पीडा : “तुइनले खोस्यो कुस्माको जेठो सन्तान” समाचार प्रकाशित भएपछि प्रमुख जिल्ला अधिकारी अनिल पौडेल नेतृत्वको टोलीले पीडामा रहेको परिवारको लागि कर्मचारीबाट सहयोग रकम संकलन ग¥यो ।
कर्मचारी मिलन केन्द्रमार्फत संकलन गरिएको ४५ हजार ५६० रुपैयाँ रकम लिएर प्रमुख जिल्ला अधिकारी अनिल पौडेल, कर्मचारी मिलन केन्द्रका अध्यक्ष जयराज पन्त, सुरक्षा निकाय कर्मचारीको टोली जिल्ला अस्पताल दार्चुलाको बेड नम्बर ९ मा पुग्दा कुस्माको आँखामा आँशु थियो ।
‘सुत्केरी महिलाको लागि सहयोग रकम लिएर आएका छौं,’ प्रमुख जिल्ला अधिकारी पौडेलले यसो भनिरहँदा कुस्माको आँखामा आँसु बगिरहेको थियो । प्रजिअ पौडेलले भने, ‘यो हाम्रोतर्फबाट परिवारलाई सानो सहयोग गरेका छौं । तपाइको पीडामा हामी साथमै छौ । नातनी बुहारीको ख्याल गर्नु ।’
