नेपाली कम्युनिस्ट पार्टी ९नेकपा० का संयोजक पुष्पकमल दाहाल ुप्रचण्डु प्रतिनिधि सभा सदस्य निर्वाचनमा रुकुम पूर्वबाट भारी मतका साथ विजयी भएका छन् ।
शुक्रबार सम्पन्न अन्तिम मतपरिणाम अनुसार प्रचण्डले १० हजार २४० मत प्राप्त गर्दै आफ्नो विजयी यात्रालाई कायमै राखेका हुन् ।
निर्वाचनमा विजयी भएपछि आफ्ना समर्थक र मतदातालाई सम्बोधन गर्दै प्रचण्डले यसपटकको निर्वाचनमा अनौठो र विचित्रको स्थिति सिर्जना भएको बताउँदै अरू सबै पूर्वप्रधानमन्त्रीहरू पराजित हुँदा आफू मात्रै निर्वाचित हुन लागेको जिकिर गरे ।
देशका शीर्ष र वरिष्ठ नेताहरू चुनावी मैदानमा पछारिएको अवस्थामा जनताले आफूलाई मात्रै विश्वास गरेर संसद् पठाएको भन्दै उनले मतदाताप्रति खुसी व्यक्त गरे ।
सम्बोधनका क्रममा प्रचण्डले आफूमाथि अब ठुलो जिम्मेवारी थपिएको महसुस गरेको समेत बताए ।
उनले भने, ‘पूर्वप्रधानमन्त्रीहरूमध्ये म मात्रै निर्वाचित हुने बडो विचित्रको स्थिति अहिले देशमा बन्यो । पार्टीका वरिष्ठ नेताहरूमध्ये पनि सम्भवतः म नै एक मात्र नेताको रूपमा विजयी बनाएर तपाईंहरूले पठाउनुभएको छ । र मैले के ठानेको छु भने, धेरै पार्टीको जिम्मेवारी पनि मैले लिनु छ ।’
उनले थपे, ‘कसैले पनि थोरै सिट ल्यायो भनेर प्रचण्डलाई हेप्ने दुस्साहस नगरुन् भनेर म खबरदारी गर्न चाहन्छु । जङ्गलमा सिंह हिँडिसकेपछि अरूको के हालत हुन्छ, त्यो हामी सबैलाई थाहा छ ।’
एमाले र कांग्रेसलाई आफूले दुई तिहाइको अहङ्कार नगर्नूस् है गल्ती हुन्छ भनेर बारम्बार संसद्मा बोलिहरेको बताउँदै संयोजक प्रचण्डले भ्रष्टाचारविरुद्ध लड्दै गर्दा विकास र समृद्धिका लागि लड्दै गर्दा सङ्ख्याको अहङ्कारले आफूलाई बाहिर पठाएको स्मरण गरे ।
उनले भने, ‘त्यही बेलामा मैले चुनौतीका साथ भनेको थिए सङ्ख्याले केही नापिँदैन । बङ्गलादेशमा एउटै पार्टीको दुई तिहाइ हुँदा पनि के हालत भयो देखिएकै छ ।’ उनले धेरै सिट ल्याएका दलहरूलाई अहङ्कारबाट बच्न अनुरोध गरे ।
‘इतिहासका आधारमा म सबैका लागि गुरु हुन सक्छु,’ उनले भने, ‘तपाईंहरूको जस्तै लहर मैले २०६४ मै देखिसकेको छु, त्यसैले अनुभवका आधारमा सबैसँग मिलेर काम गर्न तयार छु ।’
