धनगढी । पश्चिम तराईका जिल्लामा बसोबास गर्दै आएको थारू समुदायमा आज अट्वारी पर्व मनाइँदै छ । कृष्ण जन्माष्टमीपछिको पहिलो आइतबार अर्थात् शुक्ल पक्षको पहिलो आइतबार थारू समुदायले अट्वारी पर्व मनाउँदै आएका छन् ।
पर्व दुई दिनसम्म मनाइन्छ । मध्यरातमा दर खाएपछि पर्वको पहिलो दिन आइतबार आधा दिनसम्म निराहार व्रत बस्ने चलन छ । व्रतालुहरूले दिउँसोतिर पूजाआजा गरेर मात्र जल ग्रहणका साथै अन्डीको रोटी, फलफूल, दूध खाने चलन रहेको छ ।
पर्वको दोस्रो दिन व्रतालुहरूले बिहान स्नान गरेर पूजाआजा गर्ने र घरमा बनाइएका मीठामीठा परिकार खाने गर्दछन् ।
अट्वारीको अवसरमा सुदूरपश्चिम प्रदेशमा आज सार्वजनिक बिदा दिइएको छ । १९ साउनमा बसेको मन्त्रिपरिषद् बैठकले गरेको निर्णयअनुसार आज सार्वजनिक बिदा दिइएको हो ।
प्रदेशका आन्तरिक मामिला तथा कानुन मन्त्रालयका निमित्त सचिव आमोद दाहालले आज बिदा दिइएको बताए ।
