जनता समाजवादी पार्टीका अध्यक्ष उपेन्द्र यादवले तेस्रो मधेश आन्दोलनका लागि तयार रहन नेता तथा कार्यकर्तालाई निर्देशन दिएका छन् । पार्टीको मधेश प्रदेश समितिले आइतबार जनकपुरधाममा आयोजना गरेको संगठन विस्तार अभियानको उद्घाटन गर्दै अध्यक्ष यादवले मधेश विद्रोहबाट प्राप्त उपलब्धिलाई संस्थागत गर्न र समावेशी समानुपातिक सिद्धान्तलाई राज्यका हरेक क्षेत्रमा लागु गराउन आन्दोलनको आवश्यकता रहेको बताएका हुन् ।
मधेसी जनतालाई खस पहाडी शासकले अझै विदेशीको नजरले हेर्ने गरेको उनको आरोप छ । ‘संविधानमा समावेशी र समानुपातिकको कुरा उल्लेख गरिए पनि व्यवहारमा देखिएको छैन । अझै पनि संवैधानिक निकाय, प्रहरी प्रशासनलगायतका निकाय समावेशी छैन ,’ उनले भने ।
मुलुकमा मधेशको जनसंख्या ५३ प्रतिशत रहे पनि मधेशलाई मात्र १३ प्रतिशत बजेट पाउने गरेको अध्यक्ष यादवले बताए । मधेशको विकास बिना मुलुकको विकास सम्भव नभएको उनले बताए । मधेसी समाजमा पनि जातिवादीसहितका विकृति र विसंगतिविरुद्ध लड्नुपर्ने अध्यक्ष यादवको भनाइ थियो ।
कार्यक्रममा मधेश प्रदेशका पूर्वमुख्यमन्त्री लालबाबु राउतले विगतमा मधेश प्रदेशले राम्रो काम गरे पनि त्यसको प्रचारप्रसार गर्न नसक्दा गत चुनावमा पार्टीले हार व्यहोरेको बताए ।
