परराष्ट्रमन्त्री डा। आरजु राणा देउवा इटालीबाट स्वदेश फर्केकी छन् । इटालीको रोममा आयोजित खाद्य तथा कृषि सङ्गठन ९एफएओ० को ४४ औँ अधिवेशन तथा सोही क्रममा आयोजित मन्त्रीस्तरीय सम्मेलनमा भाग लिएर उनी शुक्रबार स्वदेश फर्केकी हुन् । परराष्ट्रमन्त्री राणालाई शुक्रबार बिहान त्रिभुवन अन्तर्राष्ट्रिय विमानस्थलमा परराष्ट्र सचिव अमृतबहादुर राईसहित उच्च अधिकारीहरूले स्वागत गरेका थिए ।
जुन २८ देखि जुलाई ४ सम्म आयोजित एफएओ कन्फ्रेन्सको प्रमुख सत्रका साथै त्यसक्रममा आयोजित अन्य उच्चस्तरीय बैठक तथा कार्यक्रमलाई मन्त्री राणाले सम्बोधन गरेकी थिइन् ।सम्बोधनमा उनले नेपालले खाद्य अधिकारलाई नागरिकको मौलिक अधिकारका रूपमा व्यवस्था गरेको र यसको कार्यान्वयन एवं प्राप्तिका लागि आवश्यक अन्य कानुनले आधार प्रदान गरेको बताएकी थिइन् ।
खाद्य सुरक्षा तथा गुणस्तर नियन्त्रण नीतिमार्फत नियामक मापदण्ड, प्रयोगशाला निगरानी र उपभोक्ता संरक्षणको माध्यमबाट नेपालले सुरक्षित र गुणस्तरीय खाद्य सुनिश्चित गर्दै आएको उनको भनाइ थियो ।
सो अवसरमा परराष्ट्रमन्त्री राणाले नेपाल र नेपालजस्तै भूबनोट रहेका देशका लागि दिगो कृषि प्रणाली र हिमाली क्षेत्रका लागि जलवायु वित्तमा अनुदान दिइनुपर्ने माग पनि गरेकी थिइन् । उनले जलवायु परिवर्तनको मार खेपिरहेका नेपाल, विशेषगरी यहाँको हिमाली क्षेत्रका लागि अनुदानमा आधारित अन्तर्राष्ट्रिय जलवायु वित्त सुनिश्चित गर्न आग्रह गरिन् ।
त्यसपछि उनले जर्मनीको भ्रमण गरेकी थिइन् । गत मंगलबार बर्लिनमा उनले जर्मनीका विदेशमन्त्री डा जोहान डेविड वेडफुलसँग द्विपक्षीय भेटवार्ता गरेकी थिइन् ।
