दार्चुला – भूमि समस्या समाधान आयोग दार्चुलाले अव्यवस्थित बसोबासीलाई जग्गाधनी पूर्जा वितरण गरेको छ। जिल्ला समन्वय समिति खलंगामा बुधबार आयोजित कार्यक्रममा स्थानीयलाई पूर्जा वितरण गरिएको हो ।
आयोग गठन भएपछि जिल्लामा दोस्रोपटक जग्गाधनी पूर्जा वितरण गरिएको छ । कार्यक्रम भूमि समस्या समाधान आयोग दार्चुलाका अध्यक्ष लालसिंह धामीको अध्यक्षतामा सम्पन्न भएको थियो । सो अवसरमा पूर्वमन्त्री गणेशसिंह ठगुन्ना, जिल्ला समन्वय समिति प्रमुख महादेव बडू (कश्यप), महाकाली नगर प्रमुख नरसिह चैसिर लगायतका अतिथिहरूले जग्गाधनीलाई पूर्जा वितरण गरेका छन् ।
भूमि समस्या समाधान आयोग दार्चुलाका सदस्य सचिव टिकेन्द्रसिंह धामीका अनुसार बुधबार शैल्यशिखर नगरपालिका–६ का पाँच जनालाई जग्गाधनी पूर्जा वितरण गरिएको छ । यसअघि शैल्यशिखर नगरपालिका–६ पनेबाजमा ४७ जनालाई पूर्जा वितरण गरिएको थियो ।
हालसम्म जिल्लामा ८१ जनाको फाइल तयार भइसकेको आयोगले जनाएको छ । फाइल तयार भएपछि जग्गाधनीहरूले लगतअनुसार राजस्व बुझाएपछि पूर्जा दिने व्यवस्था गरिएको सदस्य सचिव धामीले बताए ।
दार्चुलामा भूमिहीन दलित १४६ जना, सुकुम्बासी ६७ जना र अव्यवस्थित १ हजार ५६० जनाले आयोगमा निवेदन दिएका छन् । यसअघि आयोगमा ५६६ जनाको निवेदन दर्ता भएको थियो । तीमध्येबाट अहिले फाइल तयार गरी क्रमशः पूर्जा वितरण भइरहेको आयोगले जनाएको छ ।
ढिलो भए पनि पूर्जा पाएकोमा अव्यवस्थित बसोबासी खुसी देखिएका छन्। यसअघि राष्ट्रिय भूमि आयोगको समयमा जिल्लामा २० जनालाई मात्र जग्गाधनी पूर्जा वितरण गरिएको अभिलेख छ ।
