दार्चुलाको दुहुँ गाउँपालिकाले स्थानीय विद्यार्थीलाई डाक्टर र इन्जिनियर पढाउनका लागि छात्रवृत्ति उपलब्ध गराउँदै आएको छ । पालिकाले कुल खर्चको ५० प्रतिशत रकम व्यहोरेर विद्यार्थीलाई अध्ययन गराइरहेको हो ।
२०७९ सालमा नरेन्द्रबहादुर सिंह बडाल अध्यक्षमा निर्वाचित भएपछि सुरु गरिएको यो कार्यक्रम २०८० सालदेखि नियमित रूपमा सञ्चालन हुँदै आएको छ । हालसम्म पालिकाका ८ जना विद्यार्थीले एमबिबिएस, बीइ सिभिल र बीइ कम्प्युटर इन्जिनियरिङमा छात्रवृत्ति पाएर अध्ययन गरिरहेका छन् । पालिकाले विद्यार्थीलाई आधा खर्च व्यहोरेर पढाइ गराइरहेको र पढाई सकेपछि कम्तीमा एक वर्ष गाउँपालिकामै सेवा गर्नुपर्ने व्यवस्था गरेको अध्यक्ष बडालले बताए ।
यस कार्यक्रमअन्तर्गत काठमाडौँ, ललितपुर र महेन्द्रनगरका विभिन्न इन्जिनियरिङ तथा मेडिकल कलेजमा विद्यार्थी अध्ययनरत छन् ।
दुहुँ गाउँपालिकाका योजना अधिकृत बीरसिह धामीका अनुसार दुहुँ गाउँपालिका–२ का भुपेन्द्रसिह बडाल काठमाण्डु डिपार्टमेन्ट अफ कम्प्युटर साइन्स एण्ड इन्जिनियर कलेजमा आर्टिफिसियल इन्जिनियर पढिरहेका छन् । दुहुँ गाउँपालिका–४ का ओम प्रकाश जोशी हिमालयन ह्वाइट हाउँस इन्टरनेशनल कलेज पुतलिसडक काठमाण्डौंमा बिइ सिभिल पढ्दैछन् । दुहुँ गाउँपालिका–२ का लक्ष्मी कार्की जनकपुर इन्जिनियरिङ कलेज कुपण्डोल ललितपुरमा बीइ सिभिल पढ्दैछन् ।
दुहुँ गाउँपालिका–२ का भुपेन्द्रसिह कार्की हिमालय कलेज अफ इन्जिनियरिङ बानेश्वरमा बीइ कम्प्युटर पढिरहेका छन् । दुहुँ गाउँपालिका–४ का आशिष जोशी काठमाण्डौं मेडिकल कलेज पब्लिक लिमिटेडमा एमबीबीएस, दुहुँ गाउँपालिका–३ का नविन जोशी कोसमोस कलेज अफ म्यानेजमेन्ट एण्ड टेक्नोलोजी ललितपुरमा बीइ सिभिल, दुहुँ गाउँपालिका–५ का मनोज बहादुर कुँवर सुदूरपश्चिम विश्वविद्यालय डिपार्टमेन्ट अफि सिभिल इन्जिनियरिङ महेन्द्रनगरमा बिइ सीभिल तथा दुहुँ गाउँपालिका–३ का जगदीश जोशी स्कुल अफ इन्जिनियरिङ महेन्द्रनगरमा बीइ सिभिल पढिरहेका छन् ।
गाउँपालिकाले विद्यार्थी अध्ययनको लागि गरिरहेको लगानीले पढाईमा निकै सहज भएको अभिभावक भगवती बडाल बताउँछिन् । छोरा भुपेन्द्रको इन्जिनियर पढ्न कुल ८ लाख ५० हजार रुपैयाँ खर्च लाग्दैछ । त्यसमा पालिकाले ४ लाख २५ हजार रुपैयाँ छात्रबृत्ति स्वरुप दिने भएपछि पढाईमा सहज भएको उनको भनाई छ ।
जनकपुर इन्जिनियर कलेज कुपण्डोल ललितपुरमा बिइ सिभिल अध्ययनरत लक्ष्मी कार्की गाउँपालिकाले गरिरहेको लगानीले आफुहरुको पढाईमा सहयोग पुगेको बताउँछिन् । हामी तीन जना भाईबहिनी पढ्दै छौ । आमाबुवाले मात्रै कमाएर हामीलाई राम्रो ठाउँमा पढाउन सक्ने अवस्था थिएन, उनले भनिन्, गाउँपालिकाले पचास प्रतिशत व्यहोर्ने भएपछि थोरै भएपनि सहज भएको छ । पढाई सकेपछि गाउँमै सेवा गर्न पाउनु पनि हाम्रो लागि मौका पनि हो । गाउँपालिकाले विद्यार्थी इन्जिनियर डाक्टर उत्पादनको लागि गरेको लगानीले पालिकाको दक्ष जनशक्ति उत्पादनमा सहयोग पुग्ने उहाँको भनाई छ ।
शिक्षा क्षेत्रमा थप लगानी गर्दै गाउँपालिकाले कक्षा १० सम्मको शिक्षा पूर्ण रूपमा निःशुल्क गरेको छ । संविधानले माध्यमिक सम्मको शिक्षा निशुल्क भनिए पनि विद्यालयहरुमा यसअघि विभिन्न शिर्षकमा रकम उठाउने गरिएको थियो । २०७९ सालपछि अहिले पूरै पालिकाभरि शिक्षा निशुल्क रुपमा कार्यान्वयन भइरहेको गाउँपालिका शिक्षा शाखा प्रमुख लोकेन्द्रबहादुर बमले बताए ।
यस्तै पालिकाले अनाथ बालबालिकाका लागि आवासीय अनाथालय सञ्चालन गरेर गाँस, बाँस, कपाससहित पढाइको सुविधा दिइएको छ । ‘टुहुँरा बालबालिका, सहारा गाउँपालिका’ कार्यक्रममार्फत १२ जना छात्र र ३ जना छात्रालाई आवासीय अनाथलय विद्यालयमा पढाई भइरहेको बमले बताए ।
