दार्चुलामा नेपाल–भारत सीमा सुरक्षासम्बन्धी १० औं डिआईजी स्तरिय काउन्टरपार्ट समन्वय बैठकले दुवै देशका सीमा स्तम्भ अभिलेख तथा मर्मत सम्भार गर्ने सहमति भएको छ । नेपाल–भारतका सुरक्षा अधिकारीहरुको दार्चुलामा सम्पन्न बैठकले दुई देशका सीमा क्षेत्रमा ध्वस्त वा हराएका सीमा स्तम्भहरूको मर्मत, संरक्षण र पुनर्निर्माणमा सहकार्य गर्ने सहमति गरेको हो ।
नम्बर ७ बैद्यनाथ बाहिनी मुख्यालय कैलालीका बाहिनीपति प्रदीप कुमार पाल र भारत अल्मोडा सेक्टर मुख्यालयका डिआइजी सुधांशु नौटियाल सेक्टर मुख्यालय पिलिभितका डिआइजी अनिल कुमार शर्मा लगायतको नेपाल भारतका उच्च सुरक्षा अधिकारीको सहभागितामा बैठक बसेको हो ।
बैठकमा दुवै देशका सुरक्षा निकायका अधिकारीहरूले सीमा क्षेत्रको वर्तमान सुरक्षा स्थिति, चुनौती र सम्भावित खतराहरूको समीक्षा गरेको सशस्त्र प्रहरी बल नेपाल नम्बर ४४ गण हेडक्वाटर दार्चुलाका गणपति एसपी देवराज जोशीले जानकारी दिए ।
बैठकले दुवै देशका सुरक्षा निकाय बीच आपसी समन्वय र सहकार्यलाई थप प्रभावकारी बनाउने प्रतिबद्धता जनाएका छन् । बैठकमा सीमा क्षेत्रमा हुने अवैध गतिविधि, चोरी, तस्करी, लागूऔषध ओसारपसार, मानव बेचबिखन लगायतका आपराधिक गतिविधि नियन्त्रण गर्ने विषयमा छलफल भएको छ । यस्तै सीमा क्षेत्रमा आपराधिक क्रियाकलापबारे सूचना आदान–प्रदानलाई प्रभावकारी बनाउने विषयमा सहमति भएको जोशीको भनाई छ ।
पहिलोपटक दार्चुलामा आयोजना गरिएको बैठकमा सीमा क्षेत्रमा शान्ति, सुरक्षा र सौहाद्रपूर्ण वातावरण कायम राख्ने विषयमा सहमति गरेको छ ।
बैठकमा भारतीय सशस्त्र सीमा बल तर्फबाट डिआइजी सेक्टर मुख्यालय अल्मोडा, सेक्टर मुख्यालय पिलीभीत, कमाण्डेन्ट ५७ बटालियन सितारगञ्ज, कमाण्डेन्ट ५५ बटालियन पिथौरागढ, कमाण्डेन्ट ३९ बटालियन पलियाकलन, कमाण्डेन्ट ४९ बटालियन पिलीभीत, कमाण्डेन्ट ११ बटालियन दिदीहाट र डेपुटी कमाण्डेन्ट ५ बटालियन चम्पावतसहित १० जना अधिकारी सहभागी थिए ।
त्यस्तै, नेपाल तर्फबाट सशस्त्र प्रहरी बल, नेपाल नं.७ वैद्यनाथ वाहिनी मुख्यालय कैलालीका वाहिनीपति, सशस्त्र प्रहरी बल नेपाल नम्बर ३४, ३५, ४४ गणका गणपति, तथा ५१, ५२ र ५० नम्बर गुल्मका गुल्मपतिको सहभागिता रहेको थियो ।
