दार्चुला । स्थानीय तह संस्थागत क्षमता स्वमूल्याङ्कन (लिजा) को नतिजामा दार्चुलाको शैल्यशिखर नगरपालिका जिल्लामै पहिलो बनेको छ।
सङ्घीय मामिला तथा सामान्य प्रशासन मन्त्रालयले आर्थिक वर्ष २०८०/८१ मा स्थानीय तहहरूको गुणस्तर र कार्यसम्पादनको परीक्षणपछि सार्वजनिक गरेको नतिजाअनुसार शैल्यशिखर प्रथम भएको हाे ।
जिल्लाकाे शैल्यशिखर नगरपालिका (८१) अङ्कसहित पहिलो र लेकम गाउँपालिका (६१.७५) अङ्क सहित पुछारमा छ ।
यस्तै मालिकार्जुन गाउँपालिका ८०.७५, नाैगाड गाउँपालिका ८०.२५, दुहुँ गाउँपालिका ७९.२५, महाकाली नगरपालिका र अपि हिमाल गाउँपालिका समान ७८.७५, मार्मा गाउँपालिका ७२ र व्याँस गाउँपालिका ७०.२५ अङ्क प्राप्त गरेका छन् ।
मन्त्रालयका अनुसार मूल्याङ्कन शासकीय प्रबन्ध, वित्तीय व्यवस्थापन, सेवा प्रवाह, न्यायिक कार्यसम्पादन र भौतिक पूर्वाधारलगायत १० वटा मुख्य सूचकका आधारमा गरिएको हो।
यस मूल्याङ्कनको उद्देश्य स्थानीय तहहरूको कामको समीक्षा गर्ने, सुधारका क्षेत्र पहिचान गर्ने र आपसी स्वस्थ प्रतिस्पर्धा बढाउने रहेको मन्त्रालयले जनाएको छ।
