दार्चुला – मालिकार्जुन गाउँपालिकाले आर्थिक वर्ष २०८१/०८२ को दोस्रो चौमासिक सार्वजनिक सुनुवाइ कार्यक्रम सम्पन्न गरेको छ। सार्वजनिक सेवाको पारदर्शिता, जवाफदेहिता र नागरिक सहभागिता अभिवृद्धि गर्ने उद्देश्यले कार्यक्रम आयाेजना गरिएको हाे ।
गाउँपालिका अध्यक्ष हिरासिह धामी, उपाध्यक्ष कल्यानसिह धामी प्रमुख प्रशासकीय अधिकृत नरबहादुर ठगुन्ना कार्यक्रममा जवाफदेहिवक्ता रहेका थिए ।
सुनुवाइ कार्यक्रममा गाउँपालिकाका जनप्रतिनिधि, विभिन्न वडाका बासिन्दा, स्थानीय संघसंस्था, नागरिक समाज, सञ्चारकर्मी तथा अन्य सरोकारवालाहरूको उपस्थिति रहेको थियो।
कार्यक्रममार्फत गाउँपालिकाले चालु आर्थिक वर्षको दोस्रो चौमासिक अवधिमा सम्पन्न गरेका कार्यक्रम, बजेट खर्च विवरण, सेवा प्रवाहको अवस्था तथा विकास योजनाको प्रगति प्रस्तुत गरेको थियो। सहभागीहरूले जनताको चासो, गुनासो तथा सुझावहरू खुलेर राख्ने अवसर पाएका थिए।
गाउँपालिकाले सार्वजनिक सुनुवाइ कार्यक्रमले पारदर्शिता, जवाफदेहिता र जनसहभागितालाई थप मजबुत बनाएको बताउँदै आगामी दिनमा अझ प्रभावकारी, उत्तरदायी र नागरिकमैत्री सेवा प्रवाह गर्न प्रतिबद्ध रहेकाे गाउँपालिका अध्यक्ष हिरासिह धामीले बताए ।
सार्वजनिक सुनुवाइकाे सहजिकरण दार्चुला विकास संगठनले गरेकाे थियाे ।
