महाकाली नगरपालिकाले स्थानीय विपद् व्यवस्थापन तथा जलवायु उत्थानशील योजना निर्माण कार्य सुरु गरेको छ । महाकाली नगरपालिकाले विपदलाई ध्यानमा राख्दै योजना निर्माण सुरु गरेको हो ।
महाकाली नगरपालिका र सशस्त्र प्रहरी बल नम्बर ४४ गण हेडक्वाटर दार्चुलाले आइतबार विपदबाट जोगिने अभ्यासबारे नमुना प्रस्तुत गरेको थियो । महाकाली नगरपालिका विपदको उच्च जोखिममा रहेको छ । विगतका बर्षहरुमा बाढि तथा पहिरोबाट महाकाली नगरपालिकाले मानवीय क्षति सँगै ठूलो भौतिक क्षति व्यहोर्नु परेको थियो । २०७० साल, २०७९ साल लगायत अन्य बर्षहरुमा ठूलो जनधनको क्षति व्यहोरेको महाकाली नगरपालिकाले आगलागी, सडक दुर्घट्ना, चट्याङ, शितलहर, खडेरी, जङ्गली जनावरको आतङ्क लगायत थुप्रै विपदको जोखिम व्यवहोर्दै आइरहेको छ ।
सुदूरपश्चिम प्रदेश नै भुकम्पको उच्च जोखिममा रहेको बेलामा महाकाली नगरपालिका पनि भुकम्पीय जोखिमको हिसाबले ठूलो जनधनको क्षतिीहुन सक्ने आंकलन गरिएको महाकाली नगरपालिका विपद शाखा अधिकृत नरेन्द्र सह ठुन्नाले जानकारी दिए । विपदबाट हुन सक्ने जोखिमको आकलन गरि स्पष्ट योजना निर्माण गर्नुपर्ने अहिलेको आवश्यकत्ता छ, उनले भने ।
