दार्चुला । एमाले दार्चुलाले सोमबार भोली गणतन्त्रको पक्ष र अराजक गलत प्रवृत्तिका विरुद्ध बृहत जागरण सभा गर्ने भएको छ। पार्टी केन्द्रको सर्कुलर अनुसार चैत १८ गते भोली जनतामा आएका निराशालाई चिर्ने र गणतन्त्रका विषयमा सचेतना फैलाउने उद्देश्य तथा अराजकताको विरोध गर्न बृहत जागरण सभा गर्ने एमाले दार्चुलाका जिल्ला कमिटी सचिव उमेश राज जोशीले जानकारी दिए ।
केही तत्वहरुले अहिलेको व्यवस्था माथि नै धावा बोल्ने गलत कार्य गरिरहेकोले त्यस विरुद्ध सबै नागरिकलाई सचेत गराउन जागरण सभा आयोजना गरिएको नेकपा एमाले दार्चुलाका जिल्ला कमिटी अध्यक्ष ज्ञानेन्द्र घर्तीले बताए । “राजतन्त्र आएपछि के हुन्छ, भन्ने कुरा राजावादीको आन्दोलनको घटनाले प्रष्ट देखाएको छ । यस्तो अवस्थामा गणतन्त्र बलियो बनाउनु नै राम्रो हो’, यस्को लागि हामी जनतामा सचेतना फैलाउदै जान्छौ” उहाँले भन्नुभयो ।
राजा ल्याउने नाममा भईरहेका अराजक गतिविधिका विरुद्ध सबै आमनागरिकले आवाज उठाउनु जरुरी रहेको सचिव जोशीले बताउनुभयो । “राजा ल्याउने नाममा व्यक्तिका घर जलाउने, चोरी तथा लुटपाट गर्ने गतिविधि भइरहेका छन, एमालेले सधै त्यस्को विरोध गर्छ, आन्दोलनका नाममा सरकारी र जनताको व्यक्तिगत सम्पती जलाउने टोडफोड गर्ने कार्य निन्दनिय छ, त्यस्तो गर्नेलाई कडा कार्वाही गरिनुपर्छ” उहाँले भन्नुभयो । गणतन्त्रको पक्षमा नागरिक माझ जनचेतना फैलाउन आवश्यक रहेको उहाँले बताए ।
अहिले राजावादीहरुले गणतान्त्रिक व्यवस्थालाई हतोत्साहित गराउन खोजेको एमाले जिल्ला कमिटी उपाध्यक्ष परमानन्द जोशीको भनाइ छ । जागरण सभाका लागि जिल्ला भरिका सबै नेता कार्यकर्तालाई खबर गरिएको जोशीले बताए ।
एमाले पोलिटब्युरो सदस्य तथा दार्चुला इन्चार्ज गणेशसिंह ठगुन्नासहितका नेताहरूको उपस्थितिमा भोली विहान प्रभातफेरी कार्यक्रम पछि बृहत जागरण सभा आयोजना हुने उहाँँले बताए ।
