पाठेघरको मुखको क्यान्सरविरुद्धको निःशुल्क ‘एचपीभी खोप’ अभियान दार्चुलासहित देशभर सुरु भएको छ । मंगलबारदेखि सुरु भएको अभियान माघ २८ गते सम्म सञ्चालन हुने स्वास्थ्य कार्यालय दार्चुलाले जनाएको छ ।
स्वास्थ्य कार्यालय दार्चुलाका अनुसार कक्षा ६ देखि १० सम्म अध्ययनरत र विद्यालय नजाने १० देखि १४ वर्ष उमेर समूहका ७ हजार २६४ जना किशोरीलाई खोप लगाइने स्वास्थ्य कार्यालय दार्चुलाका प्रमुख बीरेन्द्र भट्टले जानकारी दिनुभयो ।
अभियाननको लागि २२८ वटा खोप केन्द्र तोकिएका छन् । २२४ जना स्वास्थ्यकर्मी, ४४८ जना स्वयंसेवक र १४० जना सुपरभाइजर खटिने कार्यालय प्रमुख भट्टको भनाई छ ।
महिलाहरुमा हुने पाठेघरको मुखको क्यान्सरको प्रमुख कारक एचपिभी भाइरस हो । यो भाइरसको दुई सयभन्दा बढी किसिमका प्रजाति हुन्छन् र तीमध्ये कम्तीमा १२ वटा प्रजाति पाठेघरको मुखको क्यान्सर गराउने प्रमुख कारक मानिन्छ । नेपालमा १६ र १८ प्रजातिका भाइरसले ८० प्रतिशतले पाठेघरको मुखको क्यान्सर गराउने अध्ययनले देखाएको छ ।
