नेकपा एमालेका पोलिटव्यूरो सदस्य एवं पूर्वमन्त्री गणेशसिह ठगुन्नाले नेपालकै बाटो भएर व्याँसको छाङ्गरु जोड्न पैदल बाटो बनाउन देशभक्त नागरिकले श्रमदानमा जुट्न अपिल गरेका छन् । प्रेस चौतारी नेपाल दार्चुलाको पाचौं जिल्ला अधिवेशन उद्घाटन गर्दै ठगुन्नाले देशभक्त र राष्ट्रभक्त नागरिकले श्रमदान गरेर पैदलबाटो निर्माणमा लाग्न अपिल गरेका हुन् ।
‘नेपालको आफ्नै भूगोलमा हिड्न बाटो नहुनु यो निकै लज्जाको विषय हो,’ पूर्वमन्त्री ठगुन्नाले भने, ‘आफ्नै घर जान भारतको अनुमति लिनुपर्दा यो भन्दा ठूलो कलङ्क के हुन्छ । अहिलेसम्म गरेका राजनीतिक कलंक फाल्न पनि अब श्रमदान गरेर भए पनि छाङ्गरु जोड्ने पैदल घोरेटोबाटो निर्माण गर्नुपर्छ ।’
यो अभियानमा यो दल त्यो दल होइन्, देशभक्त, राष्ट्रभक्त र माटोप्रति माया भएका सबै नागरिक जोडिनुपर्छ । जनता परिचालन गरेर हिड्ने बाटो चाहि खोल्नुपर्छ । फागुन र चैत महिना श्रमको महिना बनाएर सबैले बाटो खन्न हिड्नुपर्छ, उनले भने, ‘यो श्रम आह्वान हो ।’
गणतन्त्रपछि पूर्ण रुपमा बन्द भएको सुनसेरादेखि छाङ्गरुसम्मको पैदलबाटो खोल्न अब सबै जुट्नुपर्छ । स्वयं उपभोक्ता परिचालन गरेर भए पनि पैदल घोरेटोबाटो खोल्नैपर्छ । जनताले काम गर्न सक्ने ठाउँमा जनपरिचालन र अप्ठ्यारो ठाउँमा बजेट खर्च गरेर भए पनि बाटो चाहि बनाउनै पर्ने उनको भनाई छ ।
अहिले छाङ्गरुसम्मको घोरेटो बाटो खन्न अर्थ मन्त्रालयबाट साढे पाँच करोड बजेट स्वीकृत भएको समेत उनले जानकारी दिए । बजेट स्वीकृत भइसकेको छ, अब छिट्टै गाउँपालिकाको खातामा बजेट आउँछ ।
जब प्रधानमन्त्रीले अर्थमन्त्रीलाई व्याँसको पैदल घोरेटोबाटो खन्न चन्दा मागु भनेपछि ?
दार्चुलाबासीको एकमात्रै चाहना थियो, कम्तीमा नेपालको चुच्चे नक्सा भएको गाउँ छाङ्गरुसम्म जान नेपालकै पैदल घोरेटोबाटो चाहि हुनुपर्छ । भारतबाट छाङ्गरु जान भारतीय प्रशासनको अनुमूति माग्नुपर्दा राष्ट्रिय लज्जाको विषय बनेको थियो ।
कयौंपटक नेपालका जनप्रतिनिधि र सर्वसाधारण छाङ्गरु जान नपाएर बीच बाटोबाटै भारतीय एसएसबीले फर्काइदिएको थियो ।
नेपालको त्रिदेशीय नाका जोड्ने दार्चुला–टिंकर सडक तत्कालै बन्ने अवस्था छैन् । महाकाली करिडोर अन्तर्गत कञ्चनपुरको ब्रह्मदेवदेखि दार्चुलाको टिंकरसम्म पुग्न अझै वर्षौ लाग्ने अवस्था देखिएपछि पूर्वमन्त्री ठगुन्नाले एउटा अठोट गरेर सडक बन्दै गर्छ, अब नेपालकै भूमि भएर छाङ्गरु पुग्न पैदलबाटो चाहि बनाउनैपर्छ । पछिल्लो समय हरेक जसो कार्यक्रममा उनकै एउटै उद्घोष रह्यो, राजनीतिक कलंकको रुपमा रहेको आफ्नै भूमि भएर हिड्न पैदल घोरेटोबाटो चाहि खोल्नुपर्छ । यसअघि पटकपटक बाटो खोल्न बजेट नआएको होइन्, तर त्यो बजेट सही सदुपयोग नहुँदाको पीडा व्याँसका नागरिकले भोग्दै आएका छन् ।
त्यहिँ समस्या समाधान गर्न अब जनसहभागितामा जनश्रमदान र अप्ठ्यारो ठाउँमा बजेट खर्च गरेर पैदल हिड्न बाटो बनाउनुपर्छ उनले भनेका थिए । त्यसको लागि गत पुसमा दार्चुला पुगेका एमाले पोलिटव्यूरो समेत रहेका ठगुन्नाले व्याँस गाउँपालिका अध्यक्ष मंगलसिह धामीको नेतृत्वमा छाङ्गरु तिंकरका अगुवा स्थानीयलाई काठमाण्डौं हिडाए । माग एउटै थियो, प्रधानमन्त्री, अर्थमन्त्रीलाई व्याँसको छाङ्गरु पुग्न आफ्नै भूमिबाट पैदल घोरेटोबाटो पुर्ननिर्माण ।
पुस ११ गते प्रधानमन्त्री केपी शर्मा ओलीलाई भेट गरेका दार्चुला इन्चार्ज समेत रहेका ठगुन्ना नेतृत्वको टोलीले भने, ‘हामीलाई आफ्नै भूमिबाट हिड्न पैदलबाटो बनाउछु । बजेट व्यवस्थापन गरिदिनु प¥यो ।’ टोलीको अगुवाई गरेका ठगुन्नाले प्रधानमन्त्रीलाई भेटको उदेश्य दर्शाए ।
प्रधानमन्त्रीले सोधे, ‘कति बजेट चाहिने हो,’ पूर्वमन्त्री समेत रहेका ठगुन्नाले भने, ‘हामीलाई धेरै चाहिएको छैन्, अहिलेलाई ५ करोड रुपैयाँ भए बाटो खोल्छौ ।’ व्याँसको मागबारे सुनेका प्रधानमन्त्रीले अर्थमन्त्री विष्णु पौडेललाई फोन लगाए, र भने मेरा दार्चुलाका मान्छे आएका छन्, यता आउनुहुन्छ कि त्यतै पठाउँ । नभन्दै केहि छिनमै अर्थमन्त्री विष्णु पौडेल पुगि हाले । प्रधानमन्त्रीले सोधे, व्याँसको छाङ्गरु जोड्न ५ करोड बजेट चाहिने भयो, दिन सक्नुहुन्छ कि म आफै चन्दा मागु ? अलि सिरियस अलि रमाइलो पाराले कुरा राखेपछि अर्थमन्त्रीले भने, ‘सम्मानीय ज्यूबाट मर्जी भएपछि म मिलाइहाल्छु नि ।’
