सुन्दा अचम्म लाग्ला तर दार्चुला जस्तो दुर्गम क्षेत्रमा यतिबेला डाक्टरको ओइरो लागेको छ । अहिले जिल्ला अस्पताल दार्चुलामा आठ जना डाक्टर कार्यरत छन् ।
जिल्लामा डाक्टरको संख्या बढेसँगै स्वास्थ्यमा सुधार हुने स्थानीयको अपेक्षा छ । जिल्ला अस्पताल दार्चुलाले पनि प्रसुती सेवालाइ निरन्तरता दिदै थप सुधारको क्रममा रहेको जनाएको छ । अस्पतालले यो जानकारी दिएसँगै स्थानीयले खुसी व्यक्त गरेका छन् ।
खासगरी अप्रेशन गरेर सुत्केरी हुने महिलाहरुको लागि विशेषज्ञ डाक्टर आएसँगै स्वास्थ्यमा सुधारको संकेत देखिएको हो । जिल्ला अस्पताल दार्चुलाका व्यवस्थापन समिति अध्यक्ष दिपक जोशी विशेषज्ञ डाक्टर आएसँगै स्वास्थ्यमा राम्रो सुधार हुने अपेक्षा राखेको बताउँछन् ।
बरिष्ठ मेडिकल अधिकृतको रुपमा डाक्टर रञ्जित पाठक दुई दिन अघि मात्रै जिल्लामा पुगेका हुन् । उहाँमा अप्रेशन सम्बन्धि राम्रो अनुभव छ जोशी भन्छन्, सयौं महिलाको अप्रेशन गरेको अनुभव उहाँमा छ । यस्तै अप्रेशनमा डाक्टर राजेश गिरी, डाक्टर राजेश अवस्थीको साथ छ ।
‘अब अप्रेशन हुँदा बाहिर जानुपर्ने अवस्था आउदैन्,’ जोशीले भने, ‘केहि समयदेखि हामीले विशेषज्ञ चिकित्सक पाएका थिएनौं । सामान्य अप्रेशन चलेकै थियो । तर अब भने अनुभव प्राप्त चिकित्स आए पछि सेवा प्रवाह अझै बढ्ने छ ।’
जिल्ला अस्पताल दार्चुलाको कार्यालय प्रमुखमा डाक्टर सञ्जीव श्रेष्ठ, हाडर्जोनी विशेषज्ञ डाक्टर प्रलाद थापा, यस्तै डाक्टर वेद प्रकाश पन्त, डाक्टर हरिबहादुर मल्ल, र डाक्टर कबिता न्यौपाने कार्यरत छन् ।
अस्पतालले पुन अप्रेशन सेवा सुरु गरेकोमा स्थानीय दिपेन्द्र पालले अस्पताललाई धन्यवाद दिएका छन् । उनले लेखेका छन्, ‘धेरै धेरै धन्यबाद छ जिल्ला अस्पताल दार्चूलालाई । प्रसुती सेवा मात्र हैन सबैसेवालाई स्तरोन्नती गर्नुप¥यो ।’
अस्पतालमा इसिजी, एमआरआई, सिटिस्केन, ब्लड बैंक जस्ता सेवाहरुमा सुधार ल्याउनु पर्छ । कुनै पनि सिजर, सुत्केरी गराउन डडेल्धुरा र भारतको पिथौरागढ जानुपर्ने अवस्था अन्त्य हुनुपर्छ उनले भनेका छन् ।
