जिल्ला अस्पताल, दार्चुलामा दुई वर्षदेखि बालरोग विशेषज्ञ चिकित्सक नहुँदा बिरामीलाई समस्या भएको छ । दुर्गम क्षेत्रमा डाक्टर आउन नखोजेकै कारण जिल्ला अस्पतालमा बालरोग विशेषज्ञ डाक्टरको अभाव भएको हो ।
अस्पतालमा विरामी भएर आउने बालबालिकाले राम्रो उपचार पाउन सकिरहेका छैनन् । जिल्ला अस्पतालमा थुप्रै बालबालिका बिरामी भएर आउने गरेका छन्, जिल्ला अस्पताल दार्चुलाका सूचना अधिकारी डम्मरदत्त भट्टले भने, तर, हामीसँग विशेषज्ञ चिकित्सक अभाव छ । मेडिकल अधिकृतहरु भए पनि विशेषज्ञ डाक्टर नहुँदा बालबालिकाहरुको उपचार तथा चेकजाँच गर्न समस्या छ ।
दुई वर्ष अघिसम्म जिल्लामा बालरोग विशेषज्ञ हुँदा बालबालिकाले राम्रो र सस्तो उपचार पाएका थिए । बिरामी बालबालिकालाई अस्पताल लैजाँदा अरु डाक्टरलाई देखाएर ल्याउनु पर्ने बाध्यता रहेको छ ।
सुदूरपश्चिम प्रदेश सरकारको बजेटमार्फत डाक्टर राख्ने गरिएको थियो । गत वर्ष दुई पटक सूचना प्रकाशित गर्दा पनि कोही सम्पर्कमा आएनन् । यसअघि जिल्लामा अच्युत पौडेल बालरोग विशेषज्ञको रुपमा कार्यरत थिए । यो वर्ष पनि बालरोग विशेषज्ञ डाक्टरको लागि सूचना आह्वान गर्दा पनि कोही सम्पर्कमा नआएको अस्पताल प्रशासनले जनाएको छ ।
गत कात्तिक २१ गतेसम्म सूचनाको म्याद थियो, प्रशासन प्रमुख धनन्जय मिश्रले भने, तर अहिलेसम्म कोही सम्पर्कमा आएका छैनन् । गत वर्षदेखि बालरोग विशेषज्ञको रुपमा कोही सम्पर्कमा आउन चाहेका छैनन् । यो पटक पुन सूचना प्रकाशित गर्ने कि नगर्ने भन्नेबारे अन्यौंल छ ।
अस्पतालमा अहिले मेडिकल अधिकृतको रुपमा सञ्जीव श्रेष्ठ छन् । जिल्ला अस्पतालमा स्थापनाकालदेखि नै मेसुको दरबन्दी रिक्त छ । अस्पतालमा तीन जना छात्रबृत्ति करारका डाक्टर कार्यरत छन् । जिल्ला अस्पतालमा प्रदेश सरकारले हाडजोर्नी विशेषज्ञ डाक्टर प्रल्लाद थापा पठाएको छ ।
यस जिल्लामा सीमा जोडिएका कारण आर्थिक अवस्था राम्रो भएका परिवारले बालरोगको उपचारको लागि भारतको पिथौरागढ लिने गरेका छन् । जिल्ला अस्पतालमा विशेषज्ञ सेवा नभएपछि यस जिल्लाका अधिकांश बिरामी भारतको पिथौरागढ जाने गरेका छन् ।
