जलविद्युत्मा सबै खाले लगानीकर्ता आउन सक्छन् । ऐन कानुनले विदेशीलाई लगानी गर्न रोकेको छैन । जहाँसम्म भारतीय नीतिको कुरा छ, त्यो अलि बढी कूटनीतिक विषय हो । यस्ता विषय सरकारी पहलमा विस्तारै हल हुँदै जान्छन् ।
नेपाललाई जलविद्युतमा ठूलो लगानी चाहिएको छ । लामो समयदेखि हामी विदेशी लगानी आउने आशमा बसिरहेका हौं । हाम्रा ठूला परियोजनाको लाइसेन्स लामो समय विदेशी कम्पनीसँगै रहने तर आयोजना नबन्ने समस्या व्याप्त थियो ।
हामी यस्तो नहोस् भन्ने चाहन्थ्यौं र चाहन्छौं पनि । हाम्रा खोला नदीमा बग्ने पानीलाई बिजुलीमा रूपान्तरण गरेर लाभ लिन सके देशमा अहिले भोगिरहेको चरम व्यापार घाटालाई धेरै हदसम्म क्षतिपूर्ति गर्न सक्थ्यौं ।
हामी लगानी पनि गर्न नसक्ने र विदेशी लगानीकर्ताले पनि लगानी नल्याउने समस्या कायमै रहे हामीले उत्पादन गर्न सक्ने हजारौं मेगावाट बिजुलीको सम्भावना गफमा सीमित हुन पुग्छ । त्यसकारण नै हाम्रो नीति नियमले जलविद्युत्मा हुने स्वदेशी तथा विदेशी लगानीलाई प्रोत्साहन गरेको छ ।
